[size=25]أكرم عليها بالكفن هذي أمي
خايف عليها من الثرى غطاها .. والا الحصى حافيه اخاف اذاها
اكرم عليها بالكفن يا مطوع .. بالبيت ضل فراشها وغطاها
اكرم عليها بالكفن يامطوع و اشهد عليه بما عطت يمناها
هذي الضحى والليل يتحرونه .. هذي السماء و نجومها تنعاها
هذي السوالف مثلنا تبكيها ... والارض تنشد عن اثر لخطاها
هذي الكبيره كبر هذي لدنيا ... هذي لعظيمه جل من سواها
ابكي عليها مو نهار و ليله ... و لا سنه تمشي واعد قضاها
ابكي عليها كثر ما شالتني ... و كثر الحنين اللي اختلط بغناها
وكثرالأسامي و كثرمن سموها... و كثرالنجوم و كثرمن يرعاها
ابكي عليها من القهر يا دنيا ... من لي انا من لي عقب فرقاها
من فتحت عيني و لا خلتني ... شوفوا ولدها بالقبر خلاها
هل التراب بوجهها ما قصر .. شفتوا ولدها كيف هو جازاها
لوها مكاني كان ما سوتها ... لاكن اعز عيالها سواها
يا الدود شفها ذابله جنّبها .. انا ولدها و حاضر وافداها
قطعني هاك اللي تبي من جسمي ... بس الكريمه لا تجي بحذاها
و وصيك أمانه قل لها تعذرني .. و تكفى تروح تحب لي ماطاها
ابيها تغفر لي مثل ما كانت .. كل خمله مني بطيبها ترفاها
يالله عساها بالنعيم الخالد ... و عساها في جنة عدن سكناها
يا فضو هذا الكون يا هو خالي ... يا ضيق هذي الدنيا يا مقساها
يا مر طعم فراقها يا مره ... ماني مصدق ارجع ومالقاها
وشلون اجي غرفتها وما هي فيها... وش عذري لسبحتهاومصلاها
شقول انا لدولابها وشنطتها ... واذا سألني مشطها وحناها
وعباتها ومي زمزم ومصحفها ... والمبخره ورشوشها ودواها
الكل في غرفتها متفقدها ... حتى الجدار مفطّر و يرجاها
الكل يبكيها مهو ناسيها .... يالله صبرني و شلون انساها
ياليتها ماراحت و خلتني ... او وسعت لي بالقبر وياها
قصيده الشاعر المبدع الحميدي الشمري
الله يرحم امه وجميع امهات المسلمين
ويخلينا امهاتنا ذخر
[/size]